Harold Pinter pyeslərinin üslubi xüsusiyyətləri

Abstract

Dünya ədəbiyyatında özünəməxsus yeri olan dramaturq Harold Pinterin ingilis dramaturgiyasını ənənəvilikdən uzaqlaşdıraraq hadisələri absurd kontekstdə təqdim etməsi onun yaradıcılığını səciyyələndirən cəhətlərindəndir. Belə ki, onun pyeslərinin kompozisiyası, əsərlərdə problemlərin təqdim edilmə forması və onların həll edilməsi yolları, obrazlar qalereyası və onların həyatına sənətkarın öz baxış tərzi yeni teatrın – absurd teatrın formalaşmasından xəbər verirdi.

XX əsrin ikinci yarısında dramaturgiya aləminə qədəm qoyan novator sənətkar teatrda əsrlər boyunca sabitləşmiş qayda-qanunların yaratdığı sədləri məharətlə aşaraq özünəxas bir yol seçməklə ədəbi ictimaiyyətin, geniş tamaşaçı və oxucu kütləsinin diqqətini cəlb etmişdir. Lakin onun dram əsərlərinin klassik və realist teatr ənənələrindən bəhrələnmədiyini də tam olaraq söyləmək olmaz. Belə ki, dramaturqun pyeslərində yaratdığı obrazları cəmiyyətin orta və ya aşağı təbəqəsindən seçməsini, hadisələrin konkret bir məkanda baş verməsini, obrazların dilinin sadəliyini realist əsərlərə xas olan xüsusiyyətlər kimi qəbul etmək olar.