БЛОКТЫҚ БАҒДАРЛАМАЛАУ КОНСТРУКТОРЛАРЫНЫҢ КОГНИТИВТІК ДАҒДЫЛАРҒА ӘСЕРІ: ӘДЕБИЕТТЕРГЕ ШОЛУ ЖӘНЕ ЖҮЙЕЛІК ТАЛДАУ

Abstract

Бұл жүйелі шолу Scratch, Blockly және AppInventor сияқты танымал платформаларды пайдалана отырып, блокқа негізделген бағдарламалаудың когнитивтік дағдыларды дамытуға әсерін зерттейді. Жүйелік шолу бірнеше зерттеулерден алынған дәлелдерді біріктіреді, бұл платформалар білім алушылардың есептеу ойлауын, логикалық ойлауын және есептерді шешу дағдыларын дамытуға қалай ықпал ететінін көрсетеді.

Көптеген зерттеулер орта білім беру ұйымдарындағы блоктық бағдарламалауды қарастыруға, когнитивтік дағдылардың жеке түрлеріне назар аударады. Дегенмен, жоғары оқу орындарында болашақ мұғалімдерді оқытуда блоктық бағдарламалауды қолдану бойынша зерттеулер әлі де шектеулі болып табылады. Бұл шолу негізгі олқылықтарды, соның ішінде когнитивті дағдылардың тұрақтылығын бағалау және әртүрлі білім беру мекемелерінде кеңірек зерттеулер жүргізу үшін лонгитюдтік талдау жүргізудің қажеттілігін анықтайды.

Блок негізіндегі бағдарламалауды мұғалімдерге білім берудің оқу жоспарларына интеграциялау цифрлық құзыреттілікті дамытудың жаһандық тенденцияларына сәйкес келеді, бұл пәндер бойынша білім беру нәтижелерін жақсартудың маңызды әлеуетін ұсынады.