БИОЛОГИЯНЫ ОҚЫТУДА ЖОҒАРЫ СЫНЫП ОҚУШЫЛАРЫНЫҢ АҚПАРАТТЫҚ МӘДЕНИЕТІН ҚАЛЫПТАСТЫРУ ЖОЛДАРЫ

Abstract

Мақалада биологияны оқыту үдерісінде жоғары сынып оқушыларының ақпараттық мәдениетін қалыптастырудың теориялық негіздері қарастырылады. Зерттеудің өзектілігі ақпараттық қоғам жағдайында оқушылардың тек пәндік білімді меңгерумен шектелмей, ақпаратты іздеу, талдау, бағалау және тиімді пайдалану дағдыларын игеру қажеттілігімен негізделеді. Қазақстандағы білім беруді цифрландыруға бағытталған мемлекеттік бастамалар оқушылардың ақпараттық мәдениетін қалыптастырудың маңыздылығын арттырады. Зерттеудің мақсаты – биологияны оқытуда жоғары сынып оқушыларының ақпараттық мәдениетін қалыптастыру жолдарын анықтау және мобильді технологияларды қолданудың тиімділігін негіздеу. Мақалада ақпараттық мәдениет, ақпараттық құзыреттілік, мобильді технология және мобильді оқыту ұғымдары ғылыми тұрғыдан талданып, олардың өзара байланысы айқындалады. Отандық және шетелдік ғалымдардың зерттеулеріне сүйене отырып, мобильді оқытудың білім беру үдерісіндегі рөлі сипатталады. Әсіресе биология пәнінде мобильді қосымшалар, виртуалды зертханалар және цифрлық ресурстарды қолданудың тиімділігі көрсетіледі. Зерттеу нәтижесінде биологияны оқытуда оқушылардың ақпараттық мәдениетін қалыптастырудың негізгі бағыттары анықталды: ақпаратты сыни тұрғыдан бағалау, ғылыми дереккөздермен жұмыс істеу, цифрлық ресурстарды тиімді пайдалану және зерттеушілік әдістерді қолдану. Сонымен қатар, мобильді технологиялар оқушылардың ақпараттық құзыреттілігін дамытуға және өздігінен білім алу дағдыларын қалыптастыруға мүмкіндік беретіні дәлелденді. Қорытындысында биологияны оқытуда ақпараттық мәдениетті қалыптастыру мобильді технологияларды тиімді қолдануға негізделген кешенді педагогикалық үдеріс екендігі анықталды.