XARİCİ VƏ YERLİ TƏCRÜBƏDƏ İNFORMASİYA BAZALARININ TƏŞKİLİ XÜSUSİYYƏTLƏRİ

Abstract

Müasir rəqəmsal iqtisadiyyat şəraitində informasiya bazalarının təşkili müəssisələrin və bütövlükdə iqtisadi sistemlərin səmərəli fəaliyyətinin əsas determinantlarından birinə çevrilmişdir. İnformasiya resurslarının düzgün strukturlaşdırılması, operativ emalı və təhlükəsiz saxlanılması idarəetmə qərarlarının keyfiyyətinə birbaşa təsir göstərir.
Xarici təcrübə göstərir ki, inkişaf etmiş ölkələrdə informasiya bazalarının təşkili yüksək səviyyədə inteqrasiya olunmuş, standartlaşdırılmış və texnoloji cəhətdən inkişaf etmiş platformalar əsasında həyata keçirilir. Bu sistemlərdə bir çox korporativ həllər, həmçinin bulud texnologiyaları və Big Data analitikası geniş tətbiq olunur. İnformasiya axınlarının vahid mərkəzdə idarə olunması, real vaxt rejimində məlumatların emalı və müxtəlif sistemlər arasında qarşılıqlı uyğunluğun təmin edilməsi əsas xüsusiyyətlər kimi çıxış edir. Bununla yanaşı, məlumat təhlükəsizliyi beynəlxalq standartlara uyğun şəkildə təmin edilir və fərdi məlumatların qorunması prioritet istiqamət hesab olunur.
Yerli təcrübədə isə informasiya bazalarının təşkili prosesi son illərdə əhəmiyyətli inkişaf mərhələsinə qədəm qoymuşdur. Dövlət və özəl sektorda rəqəmsallaşma təşəbbüsləri, e-hökumət sistemlərinin tətbiqi və müəssisələrdə avtomatlaşdırılmış idarəetmə sistemlərinin qurulması bu sahədə müsbət irəliləyişlərə səbəb olmuşdur. Bununla belə, informasiya sistemlərinin inteqrasiyası, texnoloji infrastrukturların qeyri-bərabər inkişafı, kadr potensialının məhdudluğu və bəzi hallarda standartlaşma problemləri mövcud çətinliklər kimi qalmaqdadır.